३ किलो सुन तस्करी प्रकरण : १९ करोडको मुद्दा, १० लाखमा रिहा

चीनको केरुङ नाकाबाट तस्करी भएर आएको तीन किलो सुन प्रकरणमा पक्राउ परेकाहरु धरौटीमा रिहा भएका छन् ।

सुन तस्करीबारे अनुसन्धान गरेर राजश्व अनुसन्धान विभागले उच्च अदालत पाटनमा पाँच जनालाई प्रतिवादी बनाउँदै मुद्दा दायर गरेको थियो । ६ माघमा विभागले रसुवाका रामकृष्ण वाइबा, रसुवाकै गोसाइकुण्ड–१, थुमनका ३१ वर्षीय बुद्धिबहादुर तामाङ, सुनिल तामाङ, नीमा डिण्डुप तामाङ र कमल घलेविरुद्ध मुद्दा दायर गरेको थियो ।

उनीहरुलाई जनही ३ करोड ८० लाख ९१ हजार रुपैयाँ बिगो र सोही बराबरको जरिवाना समेत मागदाबी गर्दै राजश्व चुहावट ९नियन्त्रण तथा अनुसन्धान० ऐन, २०५२ को दफा ३ को कसुर गरेको भन्दै मुद्दा दायर गरिएको थियो ।

पाँच जनाविरुद्ध कुल १९ करोड ४ लाख ५५ हजार बिगो र सोही बराबरको जरिवना मागदाबी गरिएको थियो । पक्राउ परेकाहरु सबैलाई उच्च अदालत पाटनले धरौटीमा रिहा गर्न आदेश दिएको थियो । ७ माघमा उच्च अदालत न्यायाधीशद्वय लेखनाथ पौडेल र कृष्णराम कोइरालाको इजलासले उनीहरुलाई धरौटीमा रिहा गर्न आदेश दिएको थियो ।

जसमा सबैभन्दा बढी बुद्धिबहादुरसँग १० लाख धरौटी माग गरिएको थियो । बाँकीसँग डेढ–दुई लाख रुपैयाँ धरौटी माग भएको थियो । प्रतिवादी सबै धरौटी बुझाएर रिहा भइसकेको विभागका सूचना अधिकारी नवराज अधिकारीले बताए ।

ना २ ख ३५९७ नम्बरको गाडीमा फल्स बटम बनाएर यो समूहले गत २४ साउनमा चीनको केरुङ नाकाबाट रसुवा हुँदै ३ किलो सुन तस्करी गरेको थियो । 

सुन गायब भएपछि चालक रामकृष्ण वाइबालाई समेत अपहरण गरेर बुढानीलकण्ठ नगरपालिकामा रहेको शैलजा रिसोर्टमा लगेर बन्धक बनाइएको समेत खुलेको थियो ।

घटनाको पाँच महिनापछि मंसिरमा काठमाडौं उपत्यका अपराध अनुसन्धान कार्यालयको टोलीले सुन तस्करी तथा अपहरणको कसुरमा पाँच जनालाई पक्राउ गरेको थियो । पक्राउ परेकाहरुलाई अनुसन्धानका लागि भन्दै जिल्ला प्रहरी परिसर काठमाडौं पठाइएको थियो ।

परिसरबाट उनीहरुमाथि अपहरण तथा शरीर बन्धकको कसुरमा मुद्दा चलेको थियो । उक्त मुद्दामा धरौटी माग भएपछि उनीहरुलाई सुन तस्करीबारे अनुसन्धान गर्न राजश्व अनुसन्धान विभागमा पठाइएको थियो ।

केरुङ नाकाबाट आएको भनिएको उक्त सुन धादिङको खानिखोला आएपछि हतियारधारी समूहले लुटेको बताइएको छ । उक्त कसले लुट्यो र कहाँ पुर्‍यो भन्नेबारे अहिलेसम्म अज्ञात नै छ । यता सुन लुटिएर अपहरण गरेर बन्धक बनाइएका चालक वाइबाले २० लाख रुपैयाँको चेक काटेपछि मात्रै उनी अपहरण मुक्त भएका थिए ।

उनै वाइबाले अपहरणबारे प्रहरीमा जाहेरी दिएपछि अनुसन्धान गर्दा अपहरणको कारण सुनसँग जोडिएको खुलेको थियो ।

-अनलाइन खबरबाट

शिक्षा बिधेयक ल्याएर शिक्षा क्षेत्रलाइ अस्तब्यस्त हुन नदिने : शिक्षा मन्त्री भट्टराइ

रसुवा, शिक्षा विज्ञान तथा प्रविधि मन्त्री विद्या भट्टराईले शिक्षकहरुलाइ अन्यौलमा नरहन अनुरोध गर्दै अबको अबिधेशनमा शिक्षा बिधेयक ल्याएर शिक्षा क्षेत्र अस्तब्यस्त रहन नदिने बताउनुभयाे । गौतमबुद्ध माविको ४८ औ वार्षिक उत्सव तथा अभिभावक भेला उद्घाटन गर्दै प्रमुख अतिथि मन्त्री भट्टराइले साे कुरा बताउनु भएकाे हाे । 

उहाँले सरकारले चाँढै दरबन्दी पुनरावलोकन गरी निबृत्तिभरण कोष बनाउन लागेको बताउनुभयाे । उहाँले  सरकारले हिमाली छात्रावासको अवधारणा पनि ल्याएको जानकारी दिनुभयाे । अब शिक्षकहरु याेगदानमा आधारित सुरक्षा कोषमा समावेश हुने बताउनुभयाे । 

बिशेष अतिथि संबिधान सभा सदस्य तथा नेकपा एमालेका अध्यक्ष जनार्दन ढकालले आजको युग अनुसारको शिक्षाका विकासको लागि जोड्दिनुपर्ने बताउँदै स्मार्ट स्कुल आवश्यकता रहेको बताउदै स्वर्गीय नेता रबिन्द्र अधिकारी योगदान स्मरण गर्दै जिल्लाको विकासका लागि विगतमा आफुले पहल लिए अनुरुप विकासका कामहरु अहिले भैरहेको र पछि परेका क्षेत्रहरुको विकास गर्ने बताउनुभयो । 

जिल्ला समन्वय समिति प्रमुख अशोककुमार घिमिरेले विकास क्षेत्रमा पछि परेको नौकुण्ड गाउँपालिका अघि बढेको बताउदै स्थानीयको माग अनुसार एसइइ सेन्टर सिफारिस भएको बताउनुभयो । 

नौकुण्ड गाउँपालिका अध्यक्ष नुर्पसाङबो घलेले पहिलो पटक संघीय सरकारका मन्त्री नौकुण्डमा आउनु भएकोमा खुसी लागेकाे बताउनुभयो । उहाँले विद्यालयमा शिक्षक दरबन्दी सिर्जना गर्न अनुरोध गर्दै २९ वटा विद्यालय रहेकाे यस पालिकामा एसइइ परीक्षा सेन्टर माग गरे । 

पुर्व जिल्ला समन्वय समिति प्रमुख कुलप्रसाद भट्टलगायतका बक्ताले शुभकामना दिनुभएको थियो । सो अवसरमा विद्यालय पुर्व व्यवस्थान समिति अध्यक्षहरू तथा पुर्व प्रधानाध्यापकहरुलाइ दाेलल्ला र सम्मान-पत्र प्रदान गरी सम्मान गरिएको थियो । साे अवसरमा विद्यार्थीहरुले रोचक नृत्य तथा साँस्कृतिक कार्यक्रम प्रस्तुत गरेका थिए । स्थानीयले लामा, झाँक्री, स्याब्रु नाच प्रस्तुत समेत गरेका थिए । 

साे अवसरमा  जिल्लाका शिक्षक, बुद्दिजिवी, जनप्रतिनिधिहरू, कर्मचारी, पत्रकार, शिक्षा सेवी सहभागी थिए । 

अनेरास्ववियु सागर लामा

कालिकास्थान, अनेरास्ववियु रसुवा जिल्ला कमिटीको १४ औं जिल्ला अधिबेशनबाट सर्वसम्मत रूपमा सागर लामा अध्यक्ष पदमा निर्वाचित भएका छन्। यसै अधिबेशनबाट अन्य पदाधिकारीहरूको चयन पनि गरिएको छ।

उपाध्यक्ष पदमा रोजिना तिमिल्सिना, राजकुमार लामा र पासाङ तामाङ चयन भएका छन् भने सचिव पदमा किप्पा छिरिङ गलन, सहसचिव पदमा सुजन डंगोल, रुस्तम गुरुङ र मुकेश पौडेल चयन भएका छन्। कोषाध्यक्ष पदमा पुष्पा तामाङलाई मनोनयन गरिएको छ।

स्याफ्रुबेसी–रसुवागढी सडक स्तरोन्नति सुरु

रसुवा,  रसुवगढीनाका जाेड्ने  स्याफ्रुबेसी–रसुवागढी सडकको स्तरोन्नति निमार्णको काम सुरु हुने भएको छ । जिर्ण अवस्थामा रहेकाे सडक निर्माण थालनी भएपछि खुसीकाे संचार ल्याएकाे छ ।

 शिलन्यास गरेको करिब छ बर्षपछि स्याफ्रुबेसी–रसुवागढी सडकको स्तरोन्नति निमार्णको काम सुरु हुने भएको छ । चीन सरकारको आर्थिक तथा प्राविधिक सहयोगमा निर्माण गर्न लागिएको स्याफ्रुबेसी-रसुवागढी निमार्णको काम फागुन महिनाको पहिलो साताबाट सुरु गरिने गल्छी-त्रिशूली-मैलुङ-स्याफ्रुबेसी-रसुवागढी’ सडक योजनाले जनाएको छ ।

योजना कार्यालयका प्रमुख खड्गलाल श्रेष्ठका अनुसार सोनाम ल्होसार मनाउन गएका चीनीयाँ निर्माण कम्पनीका कर्मचारीहरू आएलगत्तै निर्माणको काम सुरु हुने छ ।

निर्माण कम्पनी चाईना तिबेत टिएनन्यु कम्पनि लिमटेडले २०७६ साल आश्विन ११ गते निर्माणको काम सुरु गर्न सडकको शलिन्यास गरेको थियो । पछिल्लो समय कोभिडका कारण रोकिएको उक्त काम सडकछेउमा रहेका संरचना तथा बिद्युतका तार, घर टहराहरू तथा जग्गाको मुआब्जा समेत बितरण गरिसकेकाले काम सुरु हने श्रेष्ठले बताउनुभयो ।

गल्छी, त्रिशूली स्याफ्रुबेसी-रसुवागढी सडक योजनाका अनुसारसम्झौता भएको मितिले ३९ महिनाभित्र काम सम्पन्न गर्ने गरी तीन करोड ७९ लाख अमेरिकी डलरमा निर्माण हुनेछ ।

१७ किलोमिटर लामो सडकको साढे आठ मिटर चौडाईमा कालोपत्रे गरिनेछ भने दायाँबायाँ छेउमा एक मिटर चौडाईको नाली रहने योजना रहेको छ ।

बहुगुणी अमलाका धेरै फाइदा

बहु औषधिय गुण्ले युक्त अमला शरिरलाई विशेष गरी कपाललाई आवश्यक पर्ने भिटामिन र मिनरल्सको निकै राम्रो स्रोत हो । पाँच हजार वर्ष अघिदेखि संसारको विभिन्न देशमा यसको सेवन गरिँदै आएको छ । यो एक गुणकारी फल हो जसले शरिरमा फाइदै फाइदा पुर्याउँछ । 

अमलाकाे सेवनले शरीरमा भएका विकार पदार्थहरू बाहिर निकाल्न मद्दत गर्छ । अमलाको नियमित सेवनले शरीरमा रोग प्रतिरोधात्मक क्षमतालाई मजबुत बनाउनुका साथै रगत सफा गर्न मद्दत गर्छ । यसको नियमित सेवनले त्वचा तथा कपाललाई सुन्दर बनाउन मद्दत गर्छ । 

भिटामिन सी : अमला भिटामिन सी को राम्रो स्रोत हो जसले रुघा खोकीको समस्या भगाउनुका साथै मुटु रोग र क्यान्सरमा समेत फाइदा पुर्याउँछ । भिटामिन सीको प्रचुर मात्रा भएका कारण यसले गिजाबाट रगत बग्ने समस्यामा राहत प्रदान गर्छ । 

कोलेस्ट्रोल घटाउँछ :  अमलाले ब्याड कोलेस्ट्रोल हटाउन सहयोग गर्छ जसका कारण मुटु स्वस्थ रहन्छ । स्वस्थ्य डाइट चार्ट अपनाउने बारे सोच्दै हुनुहुन्छ भने आफ्नो खानामा अमला समावेश गर्नु नछुटाउनुहोस् ।

पाचन क्रिया बलियो राख्छः  अमलाको तितो र अमिलो स्वादले पाचन इन्जाइमलाई एक्टिभ बनाउँछ । यसमा अत्यधिक फाइबर पाइने भएकाले पाचनमा समस्या भएकाहरुका लागि यो वरदान साबित हुनसक्छ । यसले ग्यास्ट्रोइन्टेस्टाइनल ट्र्याक्ट पनि सफा गर्न सहयोग गर्छ ।

मुटुसँग सम्बन्धित रोगको जोखिम कम गर्दछ : अमला पाउडर वा सामान्यतया अमला फलले हृदय रोगको जोखिम कम गर्न मद्दत गर्दछ किनकि यसले शरीरमा खराब कोलेस्ट्रोलको निर्माणलाई कम गर्दछ। अमलाले शरीरबाट अनावश्यक विषाक्त पदार्थहरू पनि निकाल्छ र रक्त नलीहरूलाई मोटो र बलियो बनाउँछ। अमला पाउडर महसंग सेवन गर्दा हेमोग्लोबिन वृद्धि गर्न सक्छ। त्यसैले, स्वस्थ, खुसी मुटुको लागि अमला खानुहोस् ।

मधुमेहको जोखिमबाट बचाउँछ : अमला खानुका कारणहरू धेरै छन् । त्यसमध्ये यसले रगतमा ग्लुकोजको स्तरमा सकारात्मक प्रभाव पार्छ। अमलामा घुलनशील फाइबरलाई शरीरले बिस्तारै शोषित गर्छ, जसले गर्दा रगतको स्तर बढ्नबाट बचाउँछ।

कपाल झर्नबाट जोगाउँछ : अमलाको तेल युगौंदेखि हाम्रो कपाल हेरचाह प्रणालीको हिस्सा रहेको छ । वास्तवमा यसको वैज्ञानिक आधार छ। अमलाले डन्डीफोरलाई रोक्न मद्दत गर्दछ र कपाल झर्न नियन्त्रण गर्दछ। त्यस्तै अमलालाई अन्य प्रयोजनका लागि पनि खान सकिन्छ । जस्तैः चिसो र खोकी, मुखको अल्सर, डन्डीफोर निको पार्न उपयोगी हुन्छ ।

छालाको लागि उपयोगी : अमलामा भिटामिन सी को प्रचुर मात्रा पाइने हुँदा यसले छालाको हेरचाहका लागि उत्कृष्ट घटक हो, किनकि यसले कोलाजेन उत्पादनमा मद्दत गर्दछ। यसको प्रयोगले बुढ्यौली प्रक्रियालाई ढिलो बनाउँछ र सुन्दर, कोमल छाला कायम राख्न मद्दत गर्दछ।

स्राेत : न्युज एजेन्सीहरूबाट

नेपाल निजामती कर्मचारी संगठनमा पुन: कैसाङ

 रसुवा, नेपाल निजामती कर्मचारी संगठनको १३औं जिल्ला अधिवेशन सम्पन्न भएको छ। 

सदरमुकाम धुन्चेमा सम्पन्न  १३ औँ अधिवेशनले  कैसाङ दिण्डुप तामाङको अध्यक्षतामा १६ सदस्यीय नयाँ जिल्ला कमिटी सर्वसम्मत रूपमा चयन गरेको छ।

कमिटीमा गोबिन्द आचार्य उपाध्यक्ष तथा अम्बिका देवकोटा महिला उपाध्यक्षमा चयन भएका छन्। चार्ल्स जंग शाही सचिव, बिर बहादुर बुलुन सह सचिव, र कृष्ण प्रसाद ढकाल कोषाध्यक्षमा  निर्वाचित भएका छन्।

सदस्यहरूमा छोवाड। दोर्जे तामाङ, राम सागर यादव, हर्क तामाङ, कलम बहादुर शाही, युगेन लेप्चा, अर्जुन सुबेदी चयन भएका छन्।

त्यस्तै केन्द्रीय प्रतिनिधिमा विमल कुमार घिमिरे, मिलन सापकोटा, र ईश्वरी पौडेल, तथा प्रदेश प्रतिनिधिमा खम्बु बोहरा र रन्जना लामा निर्वाचित भएका छन् । 

कार्यक्रममा विभिन्न पदाधिकारी तथा प्रतिनिधिहरूको उपस्थिति रहेको थियो। संगठनले निजामती कर्मचारीहरूको हकहितका लागि आगामी दिनमा सक्रिय भूमिका खेल्ने प्रतिवद्धता समेत व्यक्त गरेको छ।

प्रेस चौतारी रसुवाकाे अध्यक्षमा पुन: घिमिरे

कालिकास्थान, प्रेस चौतारी नेपाल रसुवा शाखाकाे चौथाे जिल्ला अधिबेशनले पुन : अध्यक्षमा बलराम घिमिरेलाई चयन गरेकाे छ ।

शनिबार कालिकास्थानमा सम्पन्न अधिबेशनबाट नव निर्वाचित कार्यसमितिकाे उपाध्यक्ष विजया तिवारी, सचिव सरस्वती न्यौपाने सचिव, उपसचिव मञ्जु तामाङ, र काेषाध्यक्ष गंगाकुमारी मिजार निर्वाचित भए । सदस्यहरूमा सूर्यबहादुर थाेक्रा, साेममाया तामाङ , सुष्मा न्यौपाने र राकेश लामा रहेका छन् ।

त्यस्तै, केन्द्रीय प्रतिनिधिमा दिपक लामा, गंगा कुमारी मिजार चयन भएका छन्। प्रदेश प्रतिनिधिमा विजया तिवारी र मञ्जु तामाङ निर्वाचित भएका छन्। नयाँ नेतृत्वलाई सपथ ग्रहणसँगै आगामी कार्यकाल सफलताको शुभकामना व्यक्त गर्दै अधिवेशन समापन गरिएको थियो।

कार्यक्रममा प्रमुख अतिथि नेकपा एमालेकाे केन्द्रीय सल्लाहकार परिषद् सदस्य तथा जिल्ला समन्वय प्रमुख अशाेककुमार घिमिरे, बागमती प्रदेश कमिटी सचिवालय सदस्य कुलप्रसाद भट्ट, प्रेस चाैतारी केन्द्रीय सदस्य तिर्थ नेपाल, जिल्ला इन्चाज दिपक लामा, नुवाकाेट जिल्ला अध्यक्ष श्रीराम अधिकारी, नेपाल पत्रकार महासंघ रसुवाका संस्थापक अध्यक्ष ज्ञानेन्द्रनाथ न्याैपानेले शुभकामना दिएका थिए ।

बन्दसत्रमा केन्द्रीय निर्वाचन कमिटी उपाध्यक्ष नबराज ढकाल लगायतले निर्वाचन प्रक्रिया बारे जानकारी दिएका थिए ।