राष्ट्रिय सम्मानका साथ अन्तिम बिदाइ तस्वीर : दिपक लामा
रसुवा, जिल्लाको कम्युनिष्ट आन्दोलनका अग्रज व्यक्तित्व, नेकपा (एमाले) का केन्द्रीय सल्लाहकार परिषद्का सदस्य तथा संविधानसभा सदस्य ६५ वर्षिय छोवाङ तेन्जेन तामाङको पार्थिव शरीरमा पार्टीको झण्डा ओढाएर नेता तथा कार्कर्ताहरू र स्थानीयले अन्तिम श्रद्धाञ्जली अर्पण गरिएको छ।
गोसाइँकुण्ड गाउँपालिका वडा नं. ६, धुन्चे निवासी तामाङको शनिबार बिहान निधन भएको हो। उनको निधनले रसुवाको राजनीतिक तथा सामाजिक क्षेत्रमा अपूरणीय क्षति पुगेको छ। धुन्चेमा आयोजित श्रद्धाञ्जली कार्यक्रममा नेकपा एमाले बागमती प्रदेश कमिटीका अध्यक्ष कैलाश ढुङ्गेलले तामाङको पार्थिव शरीरमा पार्टीको झण्डा ओढाएर सबैले भावपूर्ण श्रद्धाञ्जली अर्पण गरे ।
गोसाइँकुण्ड गाउँपालिकाका अध्यक्ष तथा नेकपा एमाले जिल्ला कमिटी अध्यक्ष कैसाङनुर्पु तामाङले उहाँको निधनले रसुवाको राजनीतिक तथा सामाजिक क्षेत्रमा अपूरणीय क्षति पुगेको बताए ।
त्यसैगरी, प्रतिनिधिसभा सदस्य मोहन आचार्य, संविधानसभा सदस्यद्वय प्रेम तामाङ र जनार्दन ढकालले उहाँको पार्थिव शरीरमा नेपालको राष्ट्रिय झण्डा ओढाएर सम्मान व्यक्त गरे । अन्तिम श्रद्धाञ्जली सभामा विभिन्न राजनीतिक दलका नेता, कार्यकर्ता, समाजसेवी तथा सर्वसाधारणको उल्लेख्य उपस्थिति रहेको थियो ।
कम्युनिष्ट आन्दोलनलाई स्थापित गर्न अग्रणी भूमिका निर्वाह गर्नुभएका तामाङ नेकपा (एमाले) रसुवाका संस्थापक सदस्य हुन् । उनले आफ्नो जीवनको लामो कालखण्ड रसुवाको राजनीतिक, सामाजिक र साङ्गठनिक विकासमा समर्पित गरे । २०५४ सालको स्थानीय निकायको निर्वाचनमा साविक धुन्चे गाउँविकास समितिको अध्यक्षका रूपमा निर्वाचित भई उनले गाउँमा संस्कार सुधार तथा जनसेवाको सुरुआत गरेका थिए ।
उनले पार्टी संगठन निर्माणका क्रममा नेकपा (एमाले) रसुवाको जिल्ला सचिव, अध्यक्ष र प्रदेश सदस्यहुँदै केन्द्रीय सल्लाहकार परिषद् सदस्यको जिम्मेवारीसम्म पुगे । बि सं २०७० सालको निर्वाचनमा संविधानसभा सदस्य भई नेपालको नयाँ संविधान निर्माणको ऐतिहासिक यात्रामा रसुवा जिल्लाको तर्फबाट महत्वपूर्ण जिम्मेवारी निर्बाह गरेका थिए । २०७९ सालको आमनिर्वाचनमा नेकपा (एमाले) का तर्फबाट प्रतिनिधिसभा सदस्यका उम्मेदवार समेत भएका थिए ।
सामाजिक क्षाेत्रमा समेत यहाँकाे ठूलाे याेगदान रहेकाे छ । उनले सैसस महासंघ, शिक्षक संगठन र घरेलु तथा साना उद्याेग महासंघमा समेत स्थापनाकालमा नेतृत्वदायी भूमिका निर्वाह गरेका थिए । शव यात्रामा जिल्ला स्थित नागरिक समाजका अध्यक्ष तथा जिल्ला स्थित नेता, कार्यकर्ता र जिल्लावासीकाे सहभागिता रहेकाे थियाे ।



No comments:
Post a Comment