रसुवा, आमाछोदिङमो गाउँपालिका–५ मा रहेको सालासुङ्गी जलविद्युत आयोजनाले आयोजना प्रभावित स्थानीय बासिन्दालाई सेयर उपलब्ध गराउने निर्णय गरेको छ।
आयोजनाका इन्जिनियर राजु श्रेष्ठका अनुसार उक्त जलविद्युत आयोजना सन २०१९ मा सुरु भई सन २०२५ मा सम्पन्न भएको हो।
७८ मेगावाट क्षमताको यो आयोजना करिब २० अर्ब रुपैयाँ लगानीमा निजी क्षेत्रबाट निर्माण गरिएको हो। आयोजना निर्माणका क्रममा प्रभावित बनेका स्थानीय बासिन्दाको माग बमोजिम सेयर वितरण गर्ने निर्णय सहित प्रक्रिया अगाडि बढाइएको उनले जानकारी दिए।
स्थानीय स्रोत–साधन, जल, जंगल र जमिन प्रयोग गरी निर्माण गरिएका संरचनामा स्थानीयलाई प्राथमिकताका आधारमा सेयर दिनुपर्ने माग स्थानीयवासीले लामो समयदेखि उठाउँदै आएका थिए। सेयर पाउनुपर्ने मागसहित स्थानीयले विरोध कार्यक्रमसमेत सुरु गरेपछि आयोजना पक्ष सेयर दिन तयार भएको जनाइएको छ।
समुद्री सतहबाट करिब ३ हजार ४ सय मिटर उचाइमा बाँध बनाएर निर्माण गरिएको उक्त आयोजनाबाट हिउँद याममा करिब १५ मेगावाट मात्र विद्युत उत्पादन हुने इन्जिनियर श्रेष्ठले बताए।
आयोजनाको तर्फबाट स्थानीयलाई सेयर दिने विषयमा औपचारिक जानकारीसहित पत्र प्राप्त भएपछि विरोध कार्यक्रम स्थगित गरिएको आमाछोदिङमो गाउँपालिका–५ का वडा अध्यक्ष दावा गोम्बो तामाङले जानकारी दिए।
0 Comments :
Post a Comment