रसुवा, फागुन २१ गते हुने प्रतिनिधिसभा निर्वाचनका लागि मोहन आचार्य र प्रेम तामाङ तेस्रो पटक निर्वाचनमा होमिएका छन् । केही नयाँ अनुहार पनि छन् ।
मुख्य निर्वाचन अधिकृतको कार्यालयका अनुसार ९ राजनीतिक दल र ३ स्वतन्त्र उम्मेदवार गरी १२ जनाको उम्मेदवारी दर्ता गरेका हुन् ।
एउटा मात्र निर्वाचन क्षेत्र रहेको रसुवामा ४१ हजार ४ सय ७१ जना मतदाता रहेका छन् । प्रतिनिधिसभा निर्वाचनका लागि नेपाली कांग्रेसको तर्फबाट इन्जिनियर मोहन आचार्यले तेस्रो पटक उम्मेदवारी मनोनयन दर्ता गराए । आचार्य २०७४ र २०७९ सालको प्रतिनिधिसभा निर्वाचनमा दुई पटक निर्वाचित भइसकेका छन् ।
नेकपा एमालेका केन्द्रीय सदस्य प्रेमबहादुर तामाङले उम्मेदवारी दर्ता गरेका छन् । तामाङ २०६४ सालमा संविधानसभा सदस्यमा निर्वाचित , २०७० सालको दोस्रो संविधानसभा निर्वाचनमा उम्मेदवार र २०७४ सालमा प्रदेशसभा सदस्यमा निर्वाचित भएका व्यक्ति हुन् ।
नेपाली कम्युनिष्ट पार्टीका तर्फबाट माधव लामिछानेले उम्मेदवारी मनोनयन दर्ता गराए । उनी पहिलो पटक निर्वाचनमा होमिएका हुन् ।
राष्ट्रिय स्वतन्त्र पार्टीका तर्फबाट बसन्त भट्टले पहिलो पल्ट उम्मेदवारी मनोनयन दर्ता गरे ।
त्यसैगरी राष्ट्रिय प्रजातन्त्र पार्टी ९राप्रपा० का तर्फबाट हरिप्रसाद घिमिरेले उम्मेदवारी मनोनयन दर्ता गराएका छन् । घिमिरे २०७९ सालको प्रदेशसभा निर्वाचनमा उम्मेदवार रहेका थिए ।
त्यसैगरी मंगोल नेशनल अर्गनाइजेसनका विनोद थिङ, प्रगतिशील लोकतान्त्रिक पार्टीका दाबासाङ्बो तामाङ, कम्युनिष्ट पार्टी (माओवादी) का होमप्रसाद आचार्य तथा उज्यालो नेपाल पार्टीका तर्फबाट मानबहादुर तामाङले मनोनयन दर्ता गराएको जिल्ला निर्वाचन अधिकारी राजन रायले बताए ।
यस अघि रास्वपाका जिल्ला संयोजक रहेका मानबहादुरले राजीनामा गरी उज्यालो नेपालको उम्मेदवार बनेका हुन् । स्वतन्त्रतर्फबाट सागर लामा, दावामिङमर तामाङ र चित्रकुमारी देवकोटाले उम्मेदवारी दिए ।
No comments:
Post a Comment