रसुवा, गत भाद्र १० गते आएको भोटेकोशी बाढीबाट प्रभावितकाे भेलाले प्रभावित नागरिकहरूको हक, अधिकार र स्थायी पुनर्वासको माग गर्दै उत्तरगया गाउँपालिका- ५, बेत्रावतीमा ०८३ कार्तिक २९ गते एक साझा सरोकार समिति गठन गरिएको छ ।
स्थानीय विप्लव खड्काको संयोजकत्वमा २३ सदस्यीय समिति गठन भएकाे हो । समितिको सह-संयोजकमा दिलकृष्ण श्रेष्ठ र सचिवमा लेखनाथ अधिकारी चयन भएका छन् । बाढीका कारण घर, जग्गा, व्यवसाय तथा आफ्नो सम्पूर्ण गाउँबस्ती नै गुमाएका मैलुङ, पैरेबेँसी, खाल्टे, नौबिसे, कैदलेटार र बेत्रावतीलगायत आसपासका प्रभावित समुदायलाई समेटेर समिति निर्माण गरिएको हो । प्रभावितहरूले निजि आवास, जिविकोर्पाजन तथा साँस्कृितक पुनर्निर्माणको विषयमा छलफल गरेका थिए ।
बाढीबाट प्रभावितहरूकाे न्याय, उचित क्षतिपूर्ति, दीर्घकालीन स्थायी पुनर्वास तथा प्रभावित नागरिकहरूको हकअधिकारको सुनिश्चिता गराउन सामूहिक रूपमा दबाब सिर्जना गर्ने मूख्य उद्देश्यले समिति गठन गरिएको जनाइएको छ ।
विपद्को यस कठिन घडीमा पीडितहरूका आवाजलाई एकताबद्ध गरी राज्य र सरोकारवाला निकायको ध्यानाकर्षण गराउन समितिले महत्वपूर्ण भूमिका खेल्ने अपेक्षा गरिएको छ ।
भेलाबाट बिभिन्न सराेकारवालाहरूसँग समन्वय गरी ३ दिन भित्र जिल्ला प्रशासन रसुवा, बागमती प्रदेश सरकार र स्थानीय सरकारमा ज्ञापन-पत्र बुझाउने र उत्तरगया गाउँपालिकामा रहेका पाँच वटै वडाका प्रभावितहरू समेटेर संगठित हुने निर्णय भएकाे सहसंयाेजक दिलकृष्ण श्रेष्ठले जानकारी दिए ।


No comments:
Post a Comment