रसुवा, गत भदौ १० गते लेन्दे खाेलाहुँदै भाेटेकाेसीमा आएको विनाशकारी बाढीले गोसाइँकुण्ड गाउँपालिका-५ स्थित स्याफ्रुबेँसीको पुल र सडक बगाएपछि रसुवाको उत्तरी भेगमा यातायात सेवा पूर्ण रूपमा ठप्प बनेको छ ।
पुल अभावले बाढीका कारण आवतजावत ठप्प हुँदा गोसाइँकुण्ड गाउँपालिका (वडा नं. १ देखि ५) र आमाछोदिङ्मो गाउँपालिका (वडा नं. १ देखि ५) का स्थानीय नागरिकले ठूलो सास्ती खेप्दै आएका छन् ।
लामो समय बितिसक्दा पनि स्याफ्रुबेँसीमा तत्काल स्थायी पुल बन्ने निश्चित नभएपछि आमाछोदिङ्मो गाउँपालिकाका स्थानीयवासी आफैँ जनश्रमदानमार्फत अस्थायी काठेपुल निर्माणमा जुटेका हुन् । असोज २५ गतेदेखि स्थानीय र सुरक्षा निकायको संयुक्त सहभागितामा काठको पुल निर्माण कार्यलाई निरन्तर अघि बढाएका छन् ।
सडक सञ्जाल अवरुद्ध हुँदा स्थानीय किसानहरूले उत्पादन गरेको नगदे बाली बजारसम्म पुर्याउन पाएका छैनन् । गत वर्ष आमाछोदिङ्मो गाउँपालिकाका वडा नं. २, ३, ४ र ५ बाट करिब ३ करोड रुपैयाँ बराबरको तरकारी निकासी भएको थियो । यस वर्ष उत्पादन बढेर करिब ६ करोड रुपैयाँ बराबरको तरकारी बजार पठाउने तयारी थियो ।
तर, बाढी गएको ५० दिन भन्दा बढी बितिसक्दा पनि यातायात सञ्चालन नहुनु र कुनै वैकल्पिक मार्गसमेत नहुँदा बन्दा, आलु र सिमीजस्ता नगदे बाली बारीमै कुहेर जाने अवस्था सिर्जना भएको छ । गत वर्षको तुलनामा दोब्बर आम्दानी हुने अपेक्षा गरेका किसानहरू वर्षभरिको मेहनत खेर जाने जोखिमले चिन्तित बनेका छन् ।
तत्काल सडक खुलाउन माग तथा पुन निर्माणमा जुट्न सरकार समक्ष स्थानीयले दावापेम्बा तामाङले अनुराेध गरेका छन् । सरकारले सवारी साधन सञ्चालनका लागि बेलीब्रिज निर्माण गर्ने तयारी गरेतापनि त्यसबाट तत्कालको समस्या समाधान नहुने देखेपछि स्थानीय आफैँ काठेपुल बनाउन जुटेका हुन् । निर्माण कार्यलाई चाँडोभन्दा चाँडो सम्पन्न गर्न गाउँवासीलाई श्रमदानमा सक्रिय सहभागी हुन आह्वान गरिएको छ ।
स्थानीय किसान तथा सर्वसाधारणले सम्बन्धित निकायसँग अवरुद्ध बनेको मूख्य सडक खण्ड तत्काल मर्मत गरी यातायात सहज बनाइदिन जोडदार माग गरेका छन्।
तस्वीर : प्रवेश खनाल एसिया नेपाल
No comments:
Post a Comment