रसुवा, जिल्लाको सदरमुकाम धुन्चे नजिकै रहेको घट्टेखोलामा १ सय ८ वटा धारा निर्माण गरिने भएको छ।
धुन्चे युवा समाजको पहलमा घट्टेखोलामा गोसाईद्वारसहित १ सय ८ वटा कलात्मक धारा निर्माण गरी मानव कल्याण तथा लोकहितका लागि प्रयोगमा ल्याउने योजना रहेको छ। यो कार्य ‘जलदान महादान’ जस्तै पवित्र पुण्यकार्य भएको र यसले उक्त क्षेत्रलाई धार्मिक तथा पर्यटकीय गन्तव्यका रूपमा विकास गर्न सक्ने रसुवा पर्यटन तथा होटल व्यवसायी संघका अध्यक्ष विशाल घलेले बताए।
रसुवा नागरिक समाजका अध्यक्ष बाबुलाल तामाङका अनुसार गोसाईकुण्ड शिरमा अवस्थित भगवान शिवको पाउ परेको पवित्र भूमिसम्म पुग्न नसक्ने श्रद्धालुहरूका लागि आफ्नै स्थानबाट सहयोग गर्न अपिल गरिएको छ।
मुक्तिनाथको संरचनाजस्तै बनाउने लक्ष्यसहित धुन्चेवासीहरू यो परियोजना सफल पार्न सबैको सहयोग प्राप्त हुनेमा विश्वस्त छन्। स्थानीय किम्बदन्तीअनुसार गोसाईबाबा यही स्थान हुँदै पानीको खोजीमा हिँडेका थिए र पहाड फोरेर पानी निकाल्दा दह बनेर बगेको पानीबाट १ सय ८ धारा निर्माण हुने विश्वास छ। कैलास दर्शनमा जाने तीर्थयात्रीहरूले समेत यहाँ स्नान गर्न सक्ने गरी संरचना तयार गरिने वेत्रावती निवासी दिल श्रेष्ठले बताए।
त्रिशूली नदीको उद्गमस्थल त्रिशूलधारा, गोसाईकुण्डलगायत १ सय ८ कुण्डबाट बगेर आएको पानी गोसाईकुण्डकै पाउ घट्टेखोलामा १ सय ८ कुण्ड निर्माण भएपछि यसको धार्मिक महत्त्व अझै बढ्ने रसुवा उद्योग वाणिज्य संघका कोषाध्यक्ष सुन्दरलाल श्रेष्ठले बताए।
यस क्षेत्रको भ्रमण गर्दा बन्यजन्तु, चराचुरुङ्गी, पुतली, जडीबुटी, गुम्बा, धार्मिक स्थल, विभिन्न सांस्कृतिक भेषभूषा तथा ज्ञान–गुनका पक्षबारे जानकारी पाउन सकिने भएकाले सबै वर्गका मानिसका लागि यो क्षेत्र महत्वपूर्ण रहेको लाङटाङ राष्ट्रिय निकुञ्जका वरिष्ठ संरक्षण अधिकृत श्यामकुमार शाहले बताए।
धर्म, संस्कार र संस्कृति हराउँदै गएको अवस्थामा धुन्चेवासीहरूले यस्तो पुण्यकार्यमा अग्रसरता देखाएकोमा आफूले पनि सहयोग गर्ने जिल्ला प्रशासन कार्यालय रसुवाका सहायक प्रमुख जिल्ला अधिकारी ध्रुवप्रसाद अधिकारीले बताए।
No comments:
Post a Comment