रसुवाकाे उत्तरी क्षेत्रमा हिमपात : स्थानीय खुसी

रसुवा , रसुवाको माथिल्लो क्षेत्रमा हिमपात भएको छ। जिल्लाको गोसाइँकुण्ड, आमाछोदिङ्मो गाउँपालिकाको माथिल्लो क्षेत्रमा हिमपात भएको हो। 

लाङटाङ, क्यान्जिन, थुमन, गतलाङको माथिल्लो भेग, बृद्धिम, धुन्चेको लेक, चन्दनबारी, चोलाङपाटी, ठूलोस्याफ्रु, लौरीबिनायकलगायतको स्थानमा वर्षासँगै हिमपात भएको छ। हिउँ परेपछि चिसोको कारण जिल्लाको जनजीवन प्रभावित बनेको छ।  

‘यसवर्ष समयमै हिमपात भयो खेतीपाती सप्रिने भाे भने  डाडाँ जस्तो भएको हिमालमा हिउँ पनि टल्कने भयो’  गोसाइकुण्ड गाउँपालिका–१ नागथलीमा होटल सञ्चालन गर्द आएका दावासाङबो तामाङ भन्छन् ‘बल्ल हिउँ प¥यो खुसी लाग्यो । ’

गोसाइँकुण्ड गाउँपालिका–१ थुमनका ८२ वर्षीय पासाङ तामाङले अहिले परेको हिउँ र पानीले खेतीबाली सप्रिने बताए। उनले भने, ‘हिउँ पर्‍यो अब खेतीपाती राम्रो हुन्छ। पानी र हिउँ परेकाले वन जंगल, पर्यटनमा पनि सकरात्मक प्रभाव  पर्छ। हिउँ परेपछि जंगलमा आगलागीको डर पनि कम हुन्छ।’

हिउँ नपर्दा जमिन निकै रुखो भएको थियो। गत्लाङका चौरीपालक कृषक चेङदावा तामाङ भन्छन् ‘हिउँ परेपछि केही दिन चिसो बढे पनि जंगल, खेतबारीमा घाँसपात उम्रिने समयमा पानी तथा हिउँ परेकाले घाँसपात पनि फस्टाउँछ वातावरण पनि स्वच्छ हुन्छ।’ 

चिसो बढेसँगै स्थानीय बासिन्दाको जनजीवन प्रभावित भएको छ । लाङटाङ र क्याङजीन क्षेत्रमा हिमपात भइरहेको स्थानीय ख ग्याल्बु तामाङले बताए । अत्यधिक चिसोका कारण धेरै स्थानीय बासिन्दा घर बाहिर निस्कन सकेका छैनन् ।

हिमपात र वर्षा भएपछि किसानहरू भने  खेतीपाती सप्रिने भन्दै खुसी भएका छन् । हिमपातका कारण आगामी फागुन २१ गते हुने प्रतिनिधिसभा सदस्य निर्वाचनमा भने खासै असर नपर्ने देखिएको छ । 

उम्मेदवारहरू हाल जिल्लाको दक्षिणी भेगमा घरदैलो कार्यक्रम सञ्चालन गरिरहेका कारण निर्वाचन गतिविधिमा प्रत्यक्ष प्रभाव नपरेको बताइएको छ । यद्यपि चिसो बढेकाले दक्षिणी भेगमा पनि घरदैलो गर्न केही समस्या देखिएको छ । 

यसैबीच जिल्ला प्रशासन कार्यालय रसुवाले चिसोबाट जोगिन आवश्यक सावधानी अपनाउन सबैलाई अनुरोध गर्दै एक सूचना जारी गरेको छ ।

तस्वीरहरू : दावा साङबाे तामाङ र ख ग्याल्बाे तामाङ