मितेरी पुलको पुनर्निर्माण सम्पन्न भई नाका सञ्चालनमा

रसुवा, नेपाल चीन सिमाना रसुवागढी स्थित मितेरी पुलको पुनर्निर्माण सम्पन्न भई नाका सञ्चालनमा आएसँगै आइतबार ८० जना नेपाली केरुङ पुगेका छन् भने ४ जना चिनियाँ नागरिक नेपाल भित्रिएका छन्।

सीमापार ढुवानीमा संलग्न रसुवाका प्रवेश पास प्राप्त सवारी चालक तथा केरुङमा व्यापार गर्दै आएका जिल्लाबासी ८० जना नाका हुँदै केरुङ गएको सीमा प्रहरी चौकी टिमुरेका प्रहरी निरीक्षक विक्रम कुँवरले जानकारी दिए। उनका अनुसार चार जना चिनियाँ नागरिक भने नेपाल प्रवेश गरेका छन्। गत असार २४ मा ल्हेन्देखोलामा उर्लिएको बाढीले नेपाल–चीन मैत्रीको प्रतीक मितेरी पुल बगाए पछि  चीन सरकारले बेलिब्रिज निर्माण गरेर करिब ६ महिनापछि नाका सञ्चालनमा आएकाे हाे ।  

रसुवागढीमा निर्माण गरिएको बेलीब्रिज आइतबारदेखि सञ्चालनमा आएको हो। गत असार २४ गते चीनतर्फको लेन्देखोलामा आएको भीषण बाढीले नेपाल–चीन व्यापारिक मार्गअन्तर्गत रहेको मितेरी पुल बगाएपछि दुई देश बीचको आवागमन तथा व्यापार साढे पाँच महिनादेखि पूर्ण रूपमा अवरुद्ध भएको थियो। चीन सरकारको आर्थिक तथा प्राविधिक सहयोगमा उक्त स्थानमा बेलीब्रिज निर्माण सम्पन्न गरिएको हो।

हालका लागि सीमापार ढुवानीमा संलग्न रसुवाका प्रवेश पास प्राप्त सवारी चालक तथा केरुङमा व्यापार गर्दै आएका जिल्लाबासीलाई मात्र चीनतर्फ प्रवेश अनुमति दिइएको प्रमुख जिल्ला अधिकारी राजेश पन्थीले जानकारी दिए।

नाका सञ्चालनमा आए पनि तत्काल सबै प्रकारका सवारी साधन सञ्चालन हुने छैनन्। चिनियाँ पक्षबाट प्राप्त जानकारीअनुसार जनवरी १, २०२६ देखि सवारी आवागमन सञ्चालन गरिने प्रमुख जिल्ला अधिकारी पन्थीले बताए।

रसुवागढी चीनबाट नेपालमा व्यापार हुने सबैभन्दा पुरानो नाका हो । यहाँबाट तयारी कपडा, स्याउ, जुत्ता चप्पल, झोला, मोटरको ब्याट्री, प्लास्टिकका सामानलगायत आयात हुने गरेको छ । 

नेपालबाट चीनतर्फ पस्मिना, गलैँचा, बाँसको मुढा, अम्रिसो, मैदा, वनस्पति घिउ, चाउचाउ, पास्ता, बिस्कुट, जुस, जाम, चिउरा, लप्सी क्यान्डी, चकलेट, सक्खर, चुइंगमलगायत वस्तु निर्यात हुँदै आएको थियो ।

०७१ मंसिर १५ गते यो नाका औपचारिक रुपमा खुल्ला भएकोमा ०७२ वैशाख १२ को विनाशकारी भूकम्प पछिको पहिरोका कारण अवरुद्ध भएकाे थियो । 

केरुङबाट सिगात्से ५ सय ४८ किमी टाढा छ । सिगात्सेसम्म रेल आएको र  रसुवागढी नाकासम्म रेलमार्गले जोड्ने चीन सरकारको योजना छ ।